ଭିଜିଲାନ୍ସ ଜାଲରେ ଭଟାଙ୍ଗପଦର ଫରେଷ୍ଟରଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଚଢ଼ାଉ

ଭବାନୀପାଟଣା, ୨୦।୨:ପ୍ରଫୁଲ୍ଲ ସାହୁ (ସମୃଦ୍ଧି ଓଡିଶା) କଳାହାଣ୍ଡି ଜିଲ୍ଲାର ଭବାନୀପାଟଣା ରେଞ୍ଜ ଅନ୍ତର୍ଗତ ଭଟାଙ୍ଗପଦର ଫରେଷ୍ଟର ଭାଗବତ ଭୂଷଣ ବେହେରା ଶୁକ୍ରବାର ଭିଜିଲାନ୍ସ ବିଭାଗର ଜାଲରେ ପଡ଼ିଛନ୍ତି। ତାଙ୍କ ବିରୋଧରେ ଆୟ ବହିର୍ଭୂତ ସମ୍ପତ୍ତି ସଂଗ୍ରହ କରିଥିବା ଠୁଳ ଅଭିଯୋଗ ଆସିଥିବାରୁ ସକାଳ ୬ଟାରୁ ଭିଜିଲାନ୍ସ ପକ୍ଷରୁ ଏକାଧିକ ସ୍ଥାନରେ ସମୟକାଳୀନ ଚଢ଼ାଉ ଆରମ୍ଭ ହୋଇଛି।
ସୂଚନା ଅନୁସାରେ, ଭବାନୀପାଟଣା ସହର ସ୍ଥିତ ତାଙ୍କ ବାସଭବନ, ଜୁନାଗଡ଼ ବ୍ଲକର ଦେଉଣ୍ଡି ଗ୍ରାମରେ ଥିବା ପୈତୃକ ଘର ଏବଂ ଭଟାଙ୍ଗପଦର ସ୍ଥିତ କାର୍ଯ୍ୟାଳୟରେ ଏହି ଚଢ଼ାଉ ଜାରି ରହିଛି। ଏହି କାର୍ଯ୍ୟରେ ଭିଜିଲାନ୍ସ ବିଭାଗର ୩ଟି ଅଲଗା ଟିମ ସାମିଲ ହୋଇ ସମସ୍ତ ଦଲିଲପତ୍ର, ଜମିଜାଗା ରେକର୍ଡ ଓ ଆର୍ଥିକ ଲେନଦେନ ସମ୍ବନ୍ଧୀୟ ପ୍ରମାଣ ସଂଗ୍ରହ କରୁଛନ୍ତି।
ପ୍ରାରମ୍ଭିକ ତଦନ୍ତରେ କିଛି ଗୁରୁତ୍ୱପୂର୍ଣ୍ଣ ଦଲିଲ ଜବତ ହୋଇଥିବା ସୂଚନା ମିଳିଛି। ଅଧିକାରୀଙ୍କ ନାମରେ ଓ ପରିବାର ସଦସ୍ୟଙ୍କ ନାମରେ ଥିବା ଅସ୍ଥାବର ଓ ଚଳ ସମ୍ପତ୍ତି ସମ୍ପର୍କରେ ଖୋଜଖବର ଚାଲିଛି। ଭିଜିଲାନ୍ସ ପକ୍ଷରୁ ସମ୍ପତ୍ତିର ମୂଲ୍ୟାୟନ ଓ ଆୟ ସୂତ୍ର ସହିତ ତୁଳନା କରାଯାଉଛି।
ଏହି ଘଟଣା କଳାହାଣ୍ଡି ଜିଲ୍ଲାରେ ଚର୍ଚ୍ଚାର ବିଷୟ ହୋଇଥିବା ବେଳେ ତଦନ୍ତ ଶେଷରେ ସଠିକ୍ ତଥ୍ୟ ସ୍ପଷ୍ଟ ହେବ ବୋଲି ଭିଜିଲାନ୍ସ ଅଧିକାରୀମାନେ କହିଛନ୍ତି। ଆଗାମୀ ଦିନରେ ଏହି ମାମଲାରେ ଆହୁରି ତଥ୍ୟ ପ୍ରକାଶ ପାଇବା ସମ୍ଭାବନା ରହିଛି।